Foreldre er oftast dei beste til å hjelpa og støtta, men ikkje alltid. Ein god venn er kanskje lettast å snakka med. Men det kan også vera lurt å snakka med læraren din, helsesjukepleiar på skulen, utekontakt eller andre vaksne du er trygg på.
Dei fleste får det betre ved å fortelja andre kva som er vanskeleg, at noko er vanleg og følgja enkle råd. Nokre gonger må ein berre koma seg gjennom vanskelege dagar og periodar, for som sagt «livet er ikkje alltid lett for nokon». Uansett er det lurt å få nok søvn, ha nokre faste rutinar, møta på skulen, delta på aktivitetar som du likar og vera med dei som er bra for deg.
Dersom du har prøvd mange ting over tid, og framleis har td vanskar med å sova, slit med å koma deg på skulen, trekkjer deg unna vener og aktivitetar eller ikkje forstår kva som skjer med deg, er det lurt å få litt meir hjelp. Då kan du snakka med helsesjukepleiar på skulen, fastlegen din og/eller psykolog.
Psykolog for barn og unge er eit lett tilgjengeleg tilbod om psykisk helsehjelp for barn og unge. Psykologen jobbar i Familiesenteret saman med familierettleiarar og utekontakt. Psykologtenesta samarbeider tett med helsestasjon/skulehelsetenesta og fastlegane, men også andre kommunale tenester.
Tilbodet er for barn og unge fram til 18 år/fullført vidaregåande skule. Ungdom over 12 år blir prioritert. Unge over 18 år kan få tilbod i den kommunale avdelinga for rus og psykisk helse.
For barn i alderen 0-12 år blir det vurdert om individuelle samtaler er det rette tilbodet, eller om rettleiing til foreldre er meir tenleg. Der det vert avtalt samtalar med barn og ungdom fokuserer vi på kva barn og ungdom sjølv kan gjera for å få det betre. Rettleiar vil prøve å forstå korleis barnet opplever seg sjølv og sin situasjon.
Tilbodet er avgrensa. Snakk gjerne med andre tenester som skulehelsetenesta, fastlegen, PPT eller anna i forkant.
- Bekymring for barn og unge si utvikling, psykiske helse og trivsel.
- Teikn på psykiske vanskar av lett/moderat grad, til dømes angst, depresjon, vanskar med deltaking i skule og fritid.
- Vanskar med samspel og kommunikasjon i familien, foreldrerolla.
- Akutte hendingar og belastningar barn, ungdom og eller familien er utsette for.
- Støttesamtalar og behandlingskontakt
- Rettleiing og støtte til foreldre, søsken, barnehage og skule ved behov
- Samarbeid med andre tenester for barn og unge
- Vurdere og bistå tilvising til psykisk helsevern for barn og unge, i samarbeid med andre tenester (sjå også helse-bergen.no: Barn og unges helseteneste)
- Ungdom over 16 år kan ta direkte kontakt, også utan foreldre sitt samtykke.
- Foreldre kan ta direkte kontakt, men helst etter dialog med andre instansar først.
- Skule eller andre tenester kan ta kontakt med samtykke frå barn/unge og foreldre.
Psykolog har teieplikt etter lov om helsepersonell. Journalføring vert ført i avgrensa område skulehelsetenesta sitt journalsystem.
Tilbodet er gratis.