Legekontora og apoteka i Kvam tilbyr influensavaksinasjon.

Ta kontakt med eit av legekontora i Kvam for bestilling av time. Sjå lenka her for eiga side om legekontora i Kvam.

Bebuarar på sjukeheim og omsorgsbustadar vil få tilbod om vaksinedosen der.

I tillegg kan kommunen arrangera dag for drop-in vaksinasjon om hausten som vert annonsert i HF og vår nettside www.kvam.no

Personar i følgjande risikogrupper bør ta influensavaksine årleg: 

• Bebuarar i omsorgsbustadar og sjukeheimar
• Alle frå fylte 65 år
• Gravide etter 12. svangerskapsveke (2. og 3. trimester). Gravide i 1. trimester med annan tilleggsrisiko skal òg få tilbod om influensavaksine
• For tidleg fødde barn, særleg barn fødd før veke 32 i svangerskapet, frå 6 månader (kronologisk alder) til 5 år.
  • Barn og vaksne med:
    - kronisk lungesjukdom (inkludert astma)
    - hjarte- og karsjukdom (anna enn velregulert høgt blodtrykk)
    - diabetes type 1 og 2
    - leversvikt eller nyresvikt
    - kronisk nevrologisk sjukdom eller skade, spesielt personar med nedsett lungekapasitet og/eller hostekraft
    - nedsett immunforsvar som følgje av sjukdom eller behandling av sjukdom (t.d. organtransplanterte, kreft, hiv, reumatoid artritt og andre sjukdommar)
    - svært alvorleg fedme (kroppsmasseindeks over 40)
    - annan alvorleg og/eller kronisk sjukdom der influensa utgjer ein alvorleg helserisiko, etter individuell vurdering av lege

I tillegg er influensavaksine tilrådd:

• Helsepersonell og andre tilsette i helse- og omsorgstenesta som har nær kontakt med pasientar ved behandling eller pleie
• Personar som bur saman med (eller er tilsvarande nære) immunsupprimerte
• Svinerøktarar og andre som har regelmessig kontakt med levande grisar

Influensa kan mellom anna føre til alvorleg lungebetennelse og forverring av mange kroniske sjukdommar. Alvorleg influensasjukdom kan føre til varig svekka helse og auka hjelpebehov, og gjennomsnittleg døyr 900 personar årleg.

Vaksinasjon vernar mot alvorleg influensa.

Influensa i svangerskapet gir noko auka risiko for dødfødsel. Gravide er òg meir utsette for følgjesjukdommar, som til dømes lungebetennelse, enn andre friske kvinner. Influensa hos spedbarn kan vere alvorleg. Vaksinasjon av mor under graviditeten vernar mor under svangerskapet og gir barnet vern mot influensa den første tida etter fødselen.

Influensavaksine bør takast årleg fordi influensavirus endrar seg heile tida og vaksina blir tilpassa desse endringane kvart år. Effekten av influensavaksinen varierer frå år til år, men ligg i gjennomsnitt på om lag 60 prosent. Det vil seie at om lag 60 prosent av dei vaksinerte er verna mot influensasjukdom. Effekten av vaksina minkar òg over tid. 

Vaksine mot influensa har vore i bruk i mange år og har generelt få biverknader. Injeksjonsvaksine mot influensa kan gi ømheit, raudheit og hevelse på stikkstaden. I nokre tilfelle kan han også gi feber, lett sjukdomskjensle og muskelsmerter. Allergiske reaksjonar eller andre alvorlege biverknader skjer svært sjeldan. 

Du kan lese meir om influensavaksine hos Folkehelseinstituttet.

Lenke til influensavaksine til risikogrupper her.

Lenke til influensavaksine til gravide her.

Lenke til influensavaksine til barn her. 

Lenke til influensavaksine til svinerøktarar her.