Formannskapet vedtok onsdag eit tilleggspunkt til det tidlegare vedtaket om å leggja kommuneplanen sin arealdel ut til ny, avgrensa høyring.

Bakgrunnen er at Kvam herad manglar gode areal for bustader tilpassa rusomsorg. Rådmannen skriv i sakspapira at ein difor ynskjer å arbeida med eit areal som kan eigna seg for fleire einingar, med potensial for eit betjent bufellesskap. I Os kommune har ein vald ei slik løysing, noko som ifølgje Os fungerer godt, og gjer bebuarane trygge og gode rammer. Ei tilsvarande løysing, i mindre skala, kan vera aktuelt i Kvam, skriv rådmannen i si saksutgreiing.

Det aktuelle området ligg sør for Auto'en i Steinsdalen og vest for industriområdet i Sandvenhagen. Det er i dag regulert som LNF-område, men vert nytta som opplagsplass. 

Kommuneplanen vert lagt ut på ny avgrensa høyring frå neste veke av.