Ungdom si deltaking i organiserte fritidsaktivitetar har gått betydeleg ned frå 2017. Førre Ungdata-undersøking synte at det i 2021 var 51 prosent som dreiv med ein organisert aktivitet  på fritida, medan talet i 2017 var på 75 prosent.

– Forsking viser ein tydeleg samanhang mellom meiningsfulle fritidsaktivitetar og det å ha god helse og ein god kvardag, seier Kristin Lundblad, som er prosjektleiar for Fritidskortet i Kvam. – Det er også ein samanhang mellom aktiv fritid og skuleprestasjonar.

Ingunn Teigland, som er prosjektleiar for BTI-prosjektet (Betre tverrfagleg innsats) stemmer i: – For oss som arbeider med fritid i Kvam, er det difor viktig at alle born og unge i heradet skal få moglegheita til å delta i fellesskap, og oppleva meistring, fellesskap og glede. Då må me også syta for at unge får vita om kva tilbod som er tilgjengelege for dei. 

– Me er dessutan opptekne av kva dei unge sjølv tenkjer om dei tilboda som finst, og om dei tenkjer noko kunne vore annleis, seier Kristin Lundblad.

Du når Ingunn på e-post ingtei@kvam.kommune.no og Kristin på e-post krisve@kvam.kommune.no.