Kommunen sitt ansvar og oppgåver på barnevernsfeltet er regulert i Lov om barnevern (barnevernslova)  med tilhøyrande forskrifter og retningslinjer. 

Barnevernet si hovudoppgåve er å sikra at barn og unge som lev under forhold som kan skade deira helse og utvikling, får naudsynt hjelp, omsorg og beskyttelse til rett tid. Barneverntenesta skal søke å avdekke omsorgssvikt, åtferds-, sosiale og emosjonelle problem, og sette i verk tiltak i forhold til dette, så tidleg at barn unngår å få varige problem. Barneverntenesta skal, uavhengig av kva tiltak som er sett i verk, følgje opp barnet og familien så lenge tiltaka varer. 

Barnet sitt beste er ei rettesnor for barnevernet sitt arbeid og avgjersler. Prinsippet om barnet sitt beste inneber at det som er til det beste for barnet skal vera avgjerande når tiltak vert vurdert. Vidare skal alle tenester og tiltak vere forsvarlege. Dette inneber at det er krav til at det vert arbeida systematisk i kontakten med barn og familiar med grunnlag i barnevernfaglege vurderingar og at dette vert dokumentert. 

Hjelpa og støtta som barnevernet set i verk skal bidra til å gje kvart enkelt barn trygge oppvekstvilkår og gode høve til utvikling. I hovudsak skal hjelpa gjevast i heimen og i nærmiljøet til barnet. Barnevernet sine tiltak må sikra at familiar får nødvendig hjelp slik at dei klarar å meistra foreldrerolla best mogleg.

Familiesenteret er her eit viktig hjelpetiltak og dei jobbar etter vedtak frå barneverntenesta.  Barn som ikkje kan få nødvendig omsorg og tryggleik i foreldreheimen skal få tilbod om alternativ omsorgsbase, i hovudsak i ein fosterheim som er rekruttert i slekt eller nettverk til barnet og familien. 

Kvam herad har inngått avtale med Bergen kommune om kjøp av barnevernvakt-tenester. Denne samarbeidsavtalen inneber at barn, ungdom og familiar i Kvam er sikra akutt hjelp utanom barneverntenesta si opningstid, det vil seie etter kontortid kvardagar og i helg/høgtidsdagar (raude dagar).

Barneverntenesta har samarbeidsavtalar med fleire viktige samarbeidspartnarar, for å sikre at me har gode føresetnadar for samarbeid på individ- og systemnivå. Ofte er felles innsats frå fleire tenester samtidig viktig for at den samla innsatsen skal ha ønska effekt.

Det er auka fokus på kompetansen til dei tilsette i barnevernet, og nye krav til kompetanse om Lov om barnevern vil gjelda frå 2031. Fleire tilsette har teke vidareutdanning eller i gang, for å stette desse krava.