Barnehageloven med tilhøyrande forskrifter styrer barnehagesektoren. Kvam herad er barnehagemynde for alle barnehagane og eigar av dei kommunale barnehagane. Heradet har ansvar for å tildela offentleg tilskot til den private barnehagen. 

Leiar for barnehage er barnehageeigar og har ansvar for leiing av dei kommunale barnehagane og at barnehagane vert drivne i samsvar med gjeldande lover og forskrifter. Barnehagemynde skal gje rettleiing og sikra at barnehagane vert drive i samsvar med gjeldande regelverk. I tillegg har dei ansvar for godkjenning, tilsyn, ivaretaking og rapportering av alle statlege føringar både for kommunale og private barnehagar.

Barnehagen som organisasjon har vore gjennom store endringar dei siste tiåra. Det er større krav til kvalitet og det er eit tydeleg krav at barnehagane skal gje alle barn eit godt grunnlag for livsmeistring og livslang læring. Rammeplan for barnehage tek utgangspunkt i eit heilskapleg læringssyn der omsorg, leik, læring og danning er sentralt. Planen har tydeleg krav til tilsette sitt verdi- og haldningsarbeid, og gjev tydelege føringar på at innhaldet i barnehagen skal ta utgangspunkt i barna sine interesser og medverknad. 

Visjonen til dei kommunale barnehagane er: «Me skapar gode barndomsminne og livsglede». 

Barnehagane i Kvam har fokus på førebygging og tidleg innsats, og har tilsett spesialpedagogar i kvar barnehage. Spesialpedagogen skal jobba med førebygging, kompetanseheving/ rettleiing, inkluderingsarbeid og enkeltvedtaksarbeid.  

Den pedagogisk-psykologiske tenesta (PPT) skal samarbeida med og støtta barnehagane i det førebyggjande arbeidet for å gje eit inkluderande barnehagetilbod til barn som kan ha behov for tilrettelegging. 

PPT er ei lovpålagt teneste og skal: 

• Støtta og rettleia barnehagane i å greia ut behov for tilrettelegging av barnehagetilbodet og å setja inn tiltak så tidleg som mogleg når det trengst
• Hjelpa til med kompetanseutvikling og organisasjonsutvikling slik at barnehagetilbodet vert så inkluderande og godt tilrettelagt som mogleg
• Utarbeida sakkunnig vurdering der lova eller forskrift til lova krev det (Barnehageloven §31). Det gjeld fyrst og fremst når foreldre eller barnehagen vurderer at barnet har behov for spesialpedagogisk hjelp
• Før ei sakkunnig vurdering vert gjort, må barnehagen i dei fleste tilfelle ha sett inn tiltak gjennom støttesystemet i barnehagen, og evaluera desse