Per 18. august var det 5.867 kvemmingar som hadde fått fyrste vaksinedose, og 3.292 kvemmingar som også hadde fått dose nummer to. Det tyder at 87,3% av innbyggjarane over 18 år har fått den fyrste vaksinedosa, og at nesten halvparten av kvemmingane er fullvaksinerte.

Frå juni av har Øystesehallen vorte nytta til vaksinering. – Der har me vaksinert opp mot 430 personar for dagen, seier stadfortredande smittevernlege Lena Laupsa. – For å få det til har me leigd inn pensjonert helsepersonell med høg vaksinasjonskompetanse. I tillegg til sjølve vaksineringa må alle dosane trekkast opp for hand og kontrollerast, og alle som kjem inn til vaksinering må registrerast og få time til dose to. I tillegg må det sendast inn informasjon til SYSVAK, det statlege vaksineregisteret.

Vaksinasjonsarbeidet er ressurskrevjande, med ei rekkje ulike oppgåver i tillegg til sjølve sprøytestikket. Over ti helsepersonell har vore i sving kvar vaksinasjonsdag. I tillegg har det vore vaktar som har hjulpe til med å overhalda smittevern og med å visa folk kor dei skulle sitja og gå. Dette arbeidet har Øystese og Fykse sanitetslag hovudsakleg stått for, etter kvart med hjelp frå Øystese bygdekvinnelag. Frametter skal friviljuge i Dalatun også bistå.

– Eg vil nytta høvet til å takka alle for innsatsen, seier rådmann Anita Hesthamar. Ho rettar ein særskilt takk til alle dei som har stilt som frivillige for lag i kommunen og til det pensjonerte helsepersonellet som har stilt opp. – Dei har utført oppgåvene på ein framifrå måte, og har vore viktige for at me har kunna knytta eige personell til andre driftsoppgåver.

Byter vaksineringsstad

No har skulane starta opp igjen, og Øystesehallen vil også vera i bruk til fritidsaktivitetar på både kveldstid og i helger. Difor vert vaksinestaden flytta frå neste veke av. Kommunen har inngått ei avtale med Vestland fylkeskommune om bruk av gymsalen i den tidlegare yrkesskulen.  

– Oppslutninga om vaksina har vore stor i Kvam, og det er me stolte av, seier Lena Laupsa. – Me ser likevel at gruppa mellom 25 og 39 år heng litt etter. Ei flott grafisk framstilling i Bergens Tidende syner at rundt 73 prosent i denne aldersgruppa har fått den fyrste dosa. Me vonar sjølvsagt at fleire melder seg. Me ynskjer høgast mogleg vaksinedekking for å kunna gå attende til normalen.

Så langt har Kvam berre vaksinert med Pfizer si vaksine, om ein ser vekk frå helsepersonell som fekk AstraZeneca-vaksina før den vart teken ut av bruk. No vil Kvam også få ein del Moderna-vaksiner. Det medfører at alle som har fått vaksine for fire veker sidan eller meir, kan få tilbod om vaksinedose to.

– Korleis fungerer det med to ulike vaksiner?

– Dei to vaksinene byggjer på den same teknologien, dei er såkalla mRNA-vaksiner som vernar mot den same delen av koronaviruset, det såkalla spike-proteinet. Den andre dosa forsterkar vernet som oppstod etter fyrste dose, noko som skjer uavhengig av kva ei av dei to mRNA-vaksinene som vert nytta, og kva for ei som har vorte gjeve tidlegare. Det er heller ikkje noko som tyder på at det gjev større risiko for biverknader. Nokre studiar tydar på at Moderna-vaksina er litt meir effektiv mot den såkalla Delta-varianten, men det er framleis uvisst.

– Kva gjer eg dersom eg har vaksinetime langt fram i tid, og ynskjer å framskunda dose to?

– Me vil ha bra med vaksinedoser frametter, men per no vil all framskunding av dose to gå føre seg i form av drop-in-vaksinering. Me har ikkje høve til å handtera bestillingar av dette på vaksinetelefonen. Når det har gått lang nok tid sidan du fekk dose ein, er det altså berre å møta opp innanfor opningstidene det vert meldt om, og få seg nok eit stikk!

----

I veke 34 (25. og 26. august) vil det verta drop-in-vaksinering, der dei som har fått fyrste dose før 8. juli kan få andre dose. Veka etter vert det drop-in-vaksinering for alle som har fått fyrste dose minst fire veker tidlegare. Det vert då vaksinert med Moderna-vaksina.