Matrikkelen er Noreg sitt offisielle register over fast eigedom, inkludert bygningar, bustader og adresser, medan grunnboka er eit offentleg register over tinglyste rettar og heftingar i fast eigedom og burettslagsdelar 

I samband med kommune- og regionreforma skal det gjennomførast ikkje mindre enn 110 millionar dataendringar i matrikkelen og grunnboka, og 3,6 millionar innbyggjarar i landet skal "flyttast" digitalt. For å redusera risiko og sikra kvalitet, og for å sikra at andre får tid til å førebu sine system med data frå matrikkelen og grunnboka, vert dei altså stengde - over heile landet - i ein del av desember.

Kva er konsekvensane av dette?

• Det vert inga matrikkelføring i kommunane i perioda matrikkelen er stengt. Dette tyder blant anna at eigedomsdanning, adressering eller bygningsregistrering ikkje kan utførast.
• Det vert inga elektronisk innsending av matrikkeldokument til tinglysing.
• Det vert inga føring av konsesjon i matrikkelen. Der konsesjonsavklaring ikkje allereie er registrert i matrikkelen, må dette gjerast på papir for eigedomar som skal tinglysast frå 16. desember og fram til nyttår. I denne perioda kan kommunar godkjenna desse manuelt. Konsesjonsavklaringa må sendast inn til Kartverket i same konvolutt som heimelsdokument. For meir info, sjå Kartverket sine nettsider.
• Det vert inga tinglysing, verken elektronisk eller på papir i perioda 27. desember kl. 20.00 til 2. januar 2020.
• Mottekne papirdokument 27. desember vil få prioritet 27. desember 2019 kl. 21.00.
• Mottekne papirdokument etter 27. desember vil få prioritet 2. januar 2020, kl. 21.00.
• Elektronisk tinglysing vert stengt heilt 27. desember kl. 20.00, og opnar att 2. januar 2020.

Sjå også: Kartverket sine nettsider.