Heradsstyremøtet går av stabelen i rådhuset frå kl. 16, og startar med orienteringar frå Sivilforsvaret, BIR og Hardangerrådet. Deretter følgjer mellom anna desse sakene:

• Uttale til regional transportplan, fylkeskommunen sitt handlings- og investeringsprogram for samferdsel for åra fram til 2033, der mellom anna ny veg forbi Tokagjelet ligg inne
• Mottak av flyktningar frå Ukraina, der det ligg føre eit framlegg om å auka talet på flyktningar som skal busetjast i Kvam i 2022 frå 15 til 95, i tråd med oppmodinga frå IMDI. Du kan sjå formannsskapet sin diskusjon om saka i kommune-TV. Innstillinga frå formannskapet var samrøystes.
• Fjernvarmeanlegg og hurtigladestasjonar.

Heile sakslista er å finna i Kvam herad sin møteportal. 

Det har også kome inn fleire interpellasjonar til møtet:

• KrF, MDG, Raudt og SV har gått saman om å føreslå ei uttale om norske born som er i oppsamlingsleirer i Syria
• Ap, H, KrF, Frp, MDG, SV og Raudt har sett fram ein interpellasjon som munnar ut i eit framlegg om å gje 200.000 kroner til Raudekrossen sitt arbeid for flyktningar i nærområda til Ukraina. 
• Jostein Ljones (Sp) har sett fram ein interpellasjon om straumpriskompensasjon til friviljuge lag og organisasjonar
• Dag Rune Mo (Ap) har meldt inn eit ynskje om at Kvam skal vera oppført i offentlege register som "herad" og ikkje "kommune"