Guttane i Ålvik Heidi Ørjansen

Ordføraren sin tale

Eg er etter kvart vorte kjend med folk frå mange industriplasser her vest. Odda, Svelgen, Årdal og Ålvik. Far min var sjølv industriarbeidar på Husnes. Det er noko som skil folkeslaget på industriplassen frå dei meir landbruks- og handelsprega bygdene rundt. Den gode historien, gjerne med overdrivingar. Ein langt meir direkte stil enn enn det andre innbyggjarar har. Og ikkje minst ein evne til å trekkja i lag og til å stå saman. Nesten alltid med ei sterk og uromantisk bevisstheit om eigen historie og eigen kultur. 

Det som de guttane har fått til her på Folkets hus og elles i Ålvik (Tyrvefjøra) er eit fyrsteklasses eksempel på bevisstheit om eigen kultur og evna til å setja pris på godt kameratskap. Ein ting er at samfunnet rundt dykk set pris og har stor glede av tiltakslysta dykkar. Ein annan ting er at eg er heilt sikker på at gleda er like stor hos dåke sjølv når de har eit slik fellesskap som de har. 

Eg har veldig lyst til gje eit lite uttrykk for at de blir lagt merke til – også uti bygde. Artig er det å følgja med på Aktuelt i Ålvik når de oppdaterer på Facebook. De utgjer verkeleg ein forskjell med arbeidet her på det tradisjonsrike Folkets hus. De varetek kulturarven i Ålvik og Kvam! 

Tusen takk for innsatsen – så langt. Eg er nokså sikker på at de ikkje gjev dykk med det fyrste

Og då kjem eg til poenget: Kvam herad deler kvart år ut ein kulturpris. Me mottok ein nominasjon, som var ganske typisk Ålvik. Den var kort og direkte og gjekk om lag slik: No er det jaggu på tide at Guttane får kulturprisen. Og slik blir det.    

Gratulerer, og takk! 

Kulturprisen er illustrert av May Linn Clement

Tysdag, dugnadsdag og utdeling

Tysdag 25. november stilte altså “Guttane” i Ålvik klar til ei ny dugnadsøkt - som dei alltid gjer om tysdagane. Dei plar starta med kaffi og ein prat før arbeidet tek til. Denne tysdagen fekk dei også besøk av ordførar Torgeir Næss, sjef for samfunnsutvikling Heidi Ørjansen og leiar for kultur og fritid Mary Ann Sørheim som kom for å dela ut pris. Dei tre utgjer juryen for årets kulturpris. 

Det må fram i lyset at dugnadsgjengen gjer langt meir enn å drikka kaffi og vareta det sosiale. Folkets hus er rusta med nye toalett, ny handicap heis, kjøken og golvdekke i hovudsalen for å nemne noko. I tillegg er dei flinke til å søke midlar for å kunne drifte desse dugnadsprosjekta. Så langt det lar seg gjere - gjer dei arbeidet sjølve.

I tillegg til eit bilete laga av May Linn Clement fekk prismottakarane eit tilskott kr 10 000.

Her kan du lesa meir om Kulturprisen og tidlegare tildelingar av den tilbake til 1977.

Heidi Ørjansen