Kvam må ha fokus på å vidareutvikla eige regionsenter i samspel med lokal- og nærsentra for å vera ei motvekt og eit attraktivt alternativ til sentralisering.

Kommuneplanen set langsiktige mål og strategiar for heile Kvammasamfunnet, Kvam herad sin tenesteproduksjon og kommunen som organisasjon. For å nærme seg målet er det i kommuneplanen formulert 5 viktige strategiområde som me meiner arealdelen bidreg til gode og framtidsretta løysingar for. Dei 5 strategiområda er:

Stadutvikling

Sentra våre skal byggja på berekraftig utvikling, og styrkjast med eit mangfald av private og offentlege tenester. Me skal ha ei god blanding av bustad, forretning og kontor, med god tilrettelegging for alle. Me vil ha varierte møteplassar som innbyr til trivsel, samarbeid, opplevingar og fysisk aktivitet.

Bustad

Kvam herad skal ha eit variert bustadtilbod tilgjengeleg for alle grupper som ynskjer å busetja seg i kommunen. Me ynskjer at folk skal verta buande her, og at dei vert buande lengst mogleg i sin eigen heim.

Kommunikasjon og infrastruktur

Kvam skal ha ein trafikksikker og effektiv infrastruktur mot Bergen for å utvida kommunen sin bu- og arbeidsregion. Me skal òg ha god kommunikasjon internt i heile kommunen for å sikra ei betre samhandling mellom grendene.

Verdiskaping gjennom samarbeid

I Kvam vil me ha ein kultur for å dyrka fram entreprenørane, kunnskapen, møteplassane, det frivillige arbeidet, kulturtilboda og lokaldemokratiet.

Livskvalitet

I Kvam skal me arbeida for at dei som bur i kommunen skal oppleva høg livskvalitet, og at samfunnet vert opplevd på same vis.