Kvam ungdomsråd er eit rådgjevande og lovpålagt folkevalt organ, som er sett saman av 11 ungdomar som representerer aldersgruppa 13- 19 år. Representantane er valde frå Strandebarm skule, Norheimsund Friskule, Kvam ungdomsskule, dei vidaregåande skulane i Kvam,  Kvam kulturskule (nytt frå hausten 2024) og Ungdomsbasen i Norheimsund. Kvar representant er valt for ein periode på 2 år og skal ikkje ha fylt 19 år på valtidspunktet. I tillegg er det vald ein representant frå Kvam heradsstyre som er valt for ein periode på 4 år som tilsvarar heradsstyreperioden.

Ungdomsrådet skal arbeida for å skapa best mogeleg ungdomsmiljø i Kvam. Rådet kan uttala seg i saker som gjeld ungdom før desse vert politisk handsama og vedtekne. Det kan i tillegg ta opp saker og fremja forslag for politiske organ som gjeld barn og unge sin kvardag.

Ungdomsrådet kan arbeida med konkrete aktivitetar og prosjekt knytt til barn og unge. 

Kvam ungdomsråd har møte- og talerett i Kvam formannskap og Kvam heradsstyre sine møte i dei saker som kjem inn under ungdomsrådet sitt arbeidsområde. 

På Kvam heradsstyre sitt møte 14.11.2024 vart samansetjinga av ungdomsrådet for hausten 2024- hausten 2025 formelt vedteke. Kvam ungdomsråd konstituerte seg 25.11.2024. Hallvard Valland Nordheim frå Kvam ungdomsskule vart vald til leiar og Alexander Nitter frå Kvam ungdomsskule vart valt til nestleiar. 

Du kan følgja med på aktiviteten til Kvam ungdomsråd på Instagram. 

Sjå også:

• Kvam ungdomsråd sitt reglement vedteke i Kvam heradsstyre sitt møte 12.11.2019, revidert 3.11.2020 og 10.12.2020. (PDF, 540 kB) Dette reglementet vart supplert med endringar vedteke i heradsstyret sitt møte 14.11.2024. Ungdomsrådet skal revidera reglementet i løpet av vinteren 2025. 
• Rettleiar for gjennomføring av nominering av representantar til Kvam ungdomsråd. Vedteken på Kvam ungdomsråd sitt møte 4.5.20 (PDF, 586 kB)

Kvam ungdomsråd er også medlem i Hardanger og Voss ungdomsråd.