Kulturlandskapsprisen i Vestland vert delt ut for andre gong i 2025. Fristen for å nominera kandidatar er 3. mars. Prisen er på 30 000 kr og skal heidra nokon som har gjort ein ekstra innsats med å ta vare på og utvikla kulturlandskapet.

Kven kan ta i mot prisen?

Vinnaren av prisen må ha utmerkt seg ved å forvalta miljø- og kulturlandskapsverdiane på ein særs god måte. Vinnaren av prisen skal ha gjort ein ekstraordinær innsats for kulturlandskapet til dømes gjennom arbeid knytt til det biologiske mangfaldet, bygningsvern, verdiskaping, formidling, tilretteleggjing og tradisjonar knytt til kulturlandskapet eller ved å bidra til merksemd om dei kulturhistoriske verdiane som kulturlandskapet i Vestland representerer.

Prisen kan delast ut til gardbrukarar og grunneigarar, mindre organisasjonar, bygde- og grendelag, grunneigarlag eller andre former for fellestiltak og samarbeid, kommunar, landbruksretta næringsverksemd og FoU-verksemder.

Ved tidlegare tildeling har juryen lagt vekt på at dette skal vera landbruksnæringa sin pris.  Juryen har difor prioritert kandidatar som gjer ein ekstraordinær innsats for kulturlandskap som vert nytta til næringsaktivitet i jord- eller skogbruk.

Korleis blir dei nominerte vurdert?

Kandidatane til kulturlandskapsprisen skal mellom anna vurderast etter desse kriteria, der alle kriteria ikkje treng å vera oppfylte på éin gong:

• Kandidaten gjer ein aktiv innsats med røkt av kulturminne og kulturmiljø
• Kandidaten arbeider målretta med å fremja eller ta vare på biologisk mangfald, mellom anna gjennom å ta vare på truga artar og naturtypar, hindra framande artar i å etablera seg eller ta vare på verdfulle genressursar
• Kandidaten har gjort kulturlandskapet tilgjengeleg for ålmenta
• Kandidaten formidlar aktivt verdiane i kulturlandskapet
• Kandidaten er ein aktiv tradisjonsberar og tek vare på immaterielle verdiar og kunnskap knytt til kulturlandskapet
• Kandidaten er ein god ambassadør for kulturlandskapet og landbruket

Korleis foreslå kandidatar?

Alle kan koma med framlegg til kandidatar. Vestland fylkeskommune oppmodar spesielt kommunar, rådgjevingsaktørar i landbruket og faglaga til å koma med framlegg på minst éin kandidat kvar. Fleire kan gjerne gå saman om éit framlegg.

Framlegg sender ein inn ved å fylla ut eit nominasjonsskjema.

Praktiske opplysingar om prisen

Prisen er eit diplom og ein pengesum på 30 000 kr.

Prisutetlinga kjem til å vera på eit lokalt arrangement eller på Landbrukskonferansen.

Juryen kan be om fleire kandidatar etter nominasjonsfristen.

Kven fortener kulturlandskapsprisen?

Me veit at det finst mange gode kandidatar til kulturlandskapsprisen i fylket. Hjelp oss å heidra ein av desse, og nominer din kandidat innan fristen 3. mars.

Kontaktperson: Kjersti Sognnes, seniorrådgjevar Vestland fylke, 95 75 87 20

Foto: Frøydis Lindèn/SFVL