Del 1 Formål og organisering
1.1 Formål
a. Barnehagen skal i samarbeid og forståing med heimen ivareta born sine behov for omsorg og leik, og fremja læring og danning som grunnlag for allsidig utvikling. Barnehagen skal byggja på grunnleggjande verdiar i kristen og humanistisk arv og tradisjon, slik som respekt for menneskeverdet og naturen, på åndsfridom, nestekjærleik, tilgjeving, likeverd og solidaritet, verdiar som kjem til uttrykk i ulike religionar og livssyn som er forankra i menneskerettane.
b. Barnehagen skal vera ei pedagogisk verksemd. Barnehagen skal møta borna med tillit og respekt og anerkjenna barndomen sin eigenverdi. Den skal bidra til trivsel og glede i leik og læring, og vera ein utfordrande og trygg stad for fellesskap og venskap. Barnehagen skal fremja demokrati og likestilling og motarbeida alle former for diskriminering.
1.2 Born sin rett til medverknad
Born har rett til å uttala seg om det som vedkjem dei, og skal ha høve til å ta del i det som omfattar livet deira i barnehagen. Det skal leggjast vekt på born sine synspunkt i samsvar med alder og modning.
1.3 Organisasjon
Dei kommunale barnehagane blir drivne i samsvar med lov om barnehagar, vedteken rammeplan for barnehagar og gjeldande departementale forskrifter og retningsliner, kommunale vedtak og planar gjeldande den einskilde barnehage.
Kvam herad har ansvar for utbygging og drift av barnehagane i heradet jf. §7 i lov om barnehagar. Den daglege drifta er delegert til rådmannen.
Barnehagane skal ha eit samarbeidsutval (SU) og eit foreldreråd, jf. §4 i lov om barnehagar og forskrifter. SU skal vera eit rådgjevande, kontaktskapande og samordnande organ. SU består av føresette og tilsette i barnehagen, der kvar gruppe er likt representert. Det er foreldrerådet som vel foreldrerepresentantar til SU, og dei tilsette som vel sine representantar. Styrar i barnehagen har ikkje stemmerett. Styrar si oppgåve er å kalla inn, skriva referat og vera møteleiar.
Barnehagen sin eigar kan delta etter eige ynskje, men ikkje med fleire representantar enn kvar av dei andre gruppene. Eigarrepresentanten har stemmerett.
1.4 Eigartilhøve
Kvam herad driv kommunale barnehagar i eigne lokale. Heradsstyret har det overordna ansvaret for å skapa gode rammevilkår for barnehagane.
1.5 Opptaksmynde
Førerett til plass i barnehage er fastsett i vedtektene del 2 samordna opptak. Rådmannen er opptaksmynde.
Det er eitt hovudopptak i året etter fastsette retningsliner, jf. vedtektene del 2 samordna opptak.
Enkeltvedtak som gjeld førerett kan føresette klaga til klagenemnda. Klagen skal sendast til Kvam herad innan 3 veker frå motteke brev, jf. §28 i forvaltningslova.
1.6 Opptaksperioden
Opptaksperioden går frå bornet får plass og ut veke 27 det året bornet skal ta til på skulen.
1.7 Opptakskrinsar
Kommunen er ein opptakskrins. Private barnehagar er gjennom ei samordning av opptaket ein del av opptakskrinsen. Kommunen skal i størst mogleg grad tilby søkjar plass i den barnehagen det vert søkt plass i, og tildelinga skal sjåast i samanheng med gruppesamansetjing og nærleik til heimen. Dersom det ikkje er mogleg å tilby plass i den barnehagen det er søkt om, kan kommunen tilby plass ved ein annan barnehage i kommunen.
1.8 Opningstida
Opningstida i barnehagane vert fastsett av styrar i samråd med leiar for barnehage og SU. Born si opphaldstid i barnehagen skal ikkje overskrida 9 timar per dag.
1.9 Leike- og opphaldsareal
Leike- og opphaldsareal føl rettleiande normer frå Kunnskapsdepartementet sine merknader til barnehagelova.
1.10 Eining/plass
Born vert rekna som 3 år frå nytt barnehageår i august. Born under tre år svarar til to einingar.
1.11 Fleire born enn arealet tilseier
Styrar, i samråd med verneombod, SU og leiar for barnehage, avgjer om det skal vera fleire born i barnehagen enn arealet tilseier. Det må her takast omsyn til alderen på borna, fysiske rammer og eventuelt andre forhold.
1.12 Planleggings- og kursdagar
Barnehagane er stengde 7 dagar i løpet av barnehageåret. Desse dagane går til planlegging, samarbeid og kompetanseutvikling for personalet, jf. arbeidsavtale for personalet (SFS nr. 2201, 3.4.).