BUA Kvam 

Prosjektgruppa og frivillige får kurs i utlånssystemet til BUA Bilete er teke med sjølvutløysar

BUA Kvam vert ein del av det nasjonale BUA-nettverket, som har 273 utlånssentralar rundt om i landet. BUA står for Barn-Unge-Aktivitet og er ein ideell organisasjon som jobbar for å gje alle moglegheita til å delta i aktivitetar, uavhengig av økonomi.

Gjennom gratis utlån av sport- og friluftsutstyr ynskjer BUA å fremja aktivitet, inkludering og berekraft i lokalsamfunna.  I vinter vil BUA tilby utlån av ski, stavar og sko til langrenn, tur og slalåm i tillegg til akematter og skøyter. 

Utstyret som er til utlån er både for barn, ungdom og vaksne. BUA Kvam vil ha faste opningstider måndagar frå 13.30 til 15.30 og torsdagar frå 17.00 til 19.00.

Godt samarbeid

Samarbeidsprosjektet BUA Kvam starta i fjor haust, og sidan august har det vore stor aktivitet i det tidlegare Røde Kors-huset. Lokalet er no oppgradert med BUA sin fargerike profil og innreiing som snart skal fyllast med utstyr.  Utanom målinga er alt som er brukt i innreiinga gjenbruk.

Prosjektgruppa har møte i BUA-lokalet Johannes Byrkjeland

I oppgraderinga har tilsette i kommunen fått svært god hjelp frå frivillige i Lions, som har lagt ned mange timar med måling og innreiing. 

Øystese Idrettslag har hand om heile den omfattande prosessen rundt utstyr, frå å søkja midlar, til innkjøp og registrering i utlånsystemet. 

Utlånsentral og gjenbruksfilial

Kvam BUA sitt hovudtilbod er utlån av moderne sports- og friluftsutstyr i ein avgrensa periode. Eit viktig prinsipp i BUA er at utstyret som vert lånt ut er tidsriktig, funksjonelt og i god stand. Mykje av utstyret vert kjøpt nytt, men me tek også imot brukt utstyr som oppfyller desse krava. 

Røde Kors-huset i Øystese vert no BUA Kvam Kristin Lundblad

Som eit tillegg til utlånstilbodet ynskjer me også å tilby moglegheit for gjenbruk. Gjenbruksloftet, lokalisert i 2. etasje på BUA,  gjev høve til å dele brukt sports- og friluftsutstyr med andre.  Tilbodet er basert på at me får inn utstyr frå publikum.  Utstyret må vere reint, funksjonelt og eigna for vidare bruk. 

Om du ynskjer å bidra med utstyr til utlån eller gjenbruk,  ta kontakt med oss slik at me kan avtala levering. 

Forutan målinga, er all oppgraderinga i BUA Kvam basert på gjenbruk. Det vert både miljøvenleg og fint. Kristin Lundblad

Vil du vita meir?

BUA Kvam inviterer til informasjonskveld torsdag 12. desember klokka 17.00 i lokala våre i Øvre Vik 3. Då kan publikum få høve til å sjå BUA-lokala, og få informasjon om korleis utlånsordninga fungerer. Det vert også moglegheit til å få informasjon om korleis ein kan bidra til BUA som frivillig.

Har du lyst til å bidra som frivillig, eller kanskje du har utstyr du ynskjer å donera? Ta kontakt med Kristin Lundblad