29. og 30. mai set Kvam kulturskule opp Ronja Røverdatter ute på Sjusete. Me gler oss storleg til å presentera denne framsyninga. Me har møtt stort engasjement i heile heradet, og har flotte folk med i produksjonen heile vegen frå Mundheim til Ålvik.
55 aktørar
55 aktørar skal vera på scenen, og alle abeider hardt for å koma i hamn. Me har jobba med produksjonen sidan august, og no skal me finpussa det heile før me gler oss til å visa alt saman fram. Flotte kostymer, stilige rekvisittar og staslege kulisser er laga av tilsette i kulturskulen, frivillege og av føresette.
Astrid Lindgren si Ronja Røverdatter spenner vidt i kjenslespekteret og er ei nydeleg historie, og me har prøvd å få fram denne spennvidda gjennom både oppbygginga av scenene, val og arrangering av musikken og gjennom dansekoreografiane.
Skodespelarane og dansarane har dykka inn i Ronja-universet, og har utforska og jobba seg godt inn i historia. På Sjusete får me sjå dei søtaste rumpnissene, dei skumlaste grådvergane, mystiske underjordiske, dei mest fryktinngytande villlvettene og dei stiligaste røvarane.
Ronja sitt liv startar storslagent. Den natta ho vert fødd, slår lynet ned og deler Mattisborga i to. Far hennar, Mattis, som er den mektigaste røvarhøvdingen i alle berg og skogar, er vill av lukke over dottera. No kjem Mattisslekta til å halda fram, for her er emnet til ein ny røvarhøvding….trur Mattis. Same natt vert det fødd endå eit emne til røvarhøvding…..Men kjem desse til å verta høvdingar?
Stykke med musikk og dans
Me lovar opplevingar som spenner frå latter til tårer, frå små dialogar til storslåtte dansescener. Samstemt med dei naturlege lydkulissane på Sjusete, skal publikum få høyra alt frå vare små viser til massive folkrocklåter. Fryd og Gaman står for dei musikalske innslaga me får på scenen. I tillegg er me heldige som har med oss det flotte husorkesteret sett saman av elevar og tilsette i kulturskulen.
Me er i gang med å bygga sceneområdet vårt på parkeringsplassen på Sjusete. Lions Club Norheimsund har rydda kratt og skog, og har laga klart naturscenen me skal nytta.
På kvar framsyning står 400 stolar klare til publikummarar. Framsyningane er kl 18.30 og 22.00, så det er viktig å kle seg etter tid og temperatur.
Billettsalet går unna, så det er lurt å vera om seg og skaffa seg billett.
Mellomaldermarknad
Før ein kjem til sceneområdet, kjem publikum til å møta ein koseleg liten mellomaldermarknad. Her vert det god stemning og mellomalderatmosfære. Anne Lise Breievne, Anne Lise Boye og Bjørnebruket stiller med mat som kan freista før ein går på framsyninga. Lokal brukskunst får publikum også høve til å kika på. Sunniva Laupsa Torvik har med seg sin fine keramikk. I tillegg er det høve til å kjøpa saueskinn og pilekorger.
Kjekke folk med tilknytning Hardanger Fartøyvernsenter stiller med tradisjonshandverk. Smeden kjem med ei lita smie. Tek du turen bortom smia får du både lukte og kjenne varmen frå essa, og på nært hald sjå korleis smeden med presisjon og tempo klarar å forma dei finaste ting av glødande jarn. Reipslagar har også med seg ei lita, mobil reiparbane der alle kan få sjå korleis ein laga tau av naturfiber i mellomalderen.
Det vert underhaldning på marknaden også. Fleire musikantar går rundt og spelar. (Øystese skulemusikklag er med på torsdag 29.mai) Anette Gabrielle Brandsøy underheld med sjonglering. Alle på marknaden har på seg mellomalderklede. Dersom publikum har lyst til å kle seg ut med tidsriktige klede, er alle sjølvsagt varmt velkomne til det.
Marknaden er open mellom kl 17.00–18.30 og 21.00–22.00 begge dagane. I tillegg er det ope i pausen i framsyninga.
Det vert gratis parkering på Sjusete desse to dagane! Hjarteleg velkomne!
