Dette er ein pris som vert delt ut annakvart år for å styrka moglegheitene ungdom har til å påverka lokalmiljøa sine og medverka i utforminga av kommunepolitikken.
- Eg synest det er kjempestas og kjekt at me er blitt ein sånn kommune som andre legg merke til. Me i ungdomsrådet har jobba for møteplassar og fritidstilbod for alle. Me har teke det opp i heradsstyret og blitt høyrt i saker, som for eksempel motocross og Base camp ved Ungdomsbasen, seier leiar i Kvam ungdomsråd Ida Djupevåg.
I søknaden om å verta nominert har Kvam herad lagt vekt på at ein over mange år har arbeidd på tvers av tenester for å leggja til rette for ei inkluderande fritid for alle barn og unge, der innspel frå barn og unge har vore viktig for prioriteringane. Mellom anna har Kvam herad ein lang tradisjon for å arrangera gratis ferieaktivitetar, og Kvam er no ein av to kommunar i Noreg som har Fritidskortet for alle unge mellom 6 og 18 år.
Det er Bufdir (Barne-, ungdoms- og familiedirektoratet) som lyser ut prisen og vinnarkommunen får 250 000 kroner.
Vinnaren vert kunngjort under Ungdomskonferansen i Mosjøen 28. august, og det er barne- og familieminister Kjersti Toppe som deler ut prisen.
Den 30. august kjem barne- og familieminister Kjersti Toppe til Kvam og Øystese idrettshall for å halda opningsinnlegg under oppvekstkonferansen med tema inkluderande fritid.
- I Kvam herad har me som visjon å skapa ei oppsiktsvekkjande framtid, og kva er vel framtid utan barn og unge? spør rådmann Anita Hesthamar.
Vidare fortel ho at gjennom fleire år har me arbeidd med ei langsiktig satsing på oppvekstvilkåra i kommunen, i tett samarbeid med dei som er barn og unge. Det er utruleg kjekt at innsatsen som våre ungdomar, medarbeidarar i kommunen og andre lokale aktørar har lagt ned, er nominert til «Årets ungdomskommune». Ekstra motiverande er det i innspurten med førebuingane til den store oppvekstkonferansen me skal arrangera no, med tema «Saman for ei inkluderande fritid». Konferansen kjem som ei oppfølging av oppvekstplanen, der aktiv fritid er eit viktig tema, med følgjande hovudmål: Alle barn og unge skal ha høve til å delta i fritidsaktivitetar og leik som passar for deira alder, interesser og ferdigheiter. Og barn og unge skal vera med og påverka korleis leik og fritidsaktitetar skal vera.
Lenker til vidare lesing: