Kvam herad sender med dette ut utkast til ny forskrift om opning for bruk avrestlysforsterkande og termiske siktemiddel ved jakt på hjort på høyring.
 

Høyringsfrist er 28. august 2026.
 

Bakgrunn for høyringa
Etter «viltressursloven» § 26 og «Forskrift om utøving av jakt, felling og fangst» § 29 a er det opna for at kommunar kan fastsetje lokal forskrift om bruk av restlysforsterkande og termiske siktemiddel ved jakt på hjort når dette er nødvendig for å avverje alvorleg skade på natur eller samfunnsinteresser som følgje av høg bestandstettleik.
 

Utdrag frå forskrift om utøving av jakt, felling og fangst § 29 a, fjerde ledd: «For å avverge alvorlig skade på natur- eller samfunnsinteresser som følge av høy bestandstetthet, kan kommunen i forskrift åpne for bruk av restlysforsterkende og termiske siktemidler ved jakt på hjort. Bruken av restlysforsterkende og termiske siktemidler skal avgrenses til jakt i åpent terreng. Kommunen skal vurdere behovet for videreføring av en slik forskriftsregel hvert femte år. Kopi av vurderingen skal sendes Landbruksdirektoratet. Jegeren skal rapportere bruk av restlysforsterkende og termiske siktemidler ved felling av hjort i Hjorteviltregisteret.»
 

Hjortestamma i Kvam herad har over lengre tid vore høg. Dette har medført utfordringar knytt til beiteskadar i frukthagar, nyplantingar av skog og på grovfôrareal i heile kommunen, trafikkpåkøyrslar på strekka frå Berge til Gravdal, og ei hjortestamme i dårleg kondisjon. Det er eit mål om å redusera hjortestamma, og det er ynskjeleg at dette skjer gjennom raske og presise fellingar for å sikre god dyrevelferd. Med dette til bakgrunn vurderer heradet å opna for bruk av restlysforsterkande og termiske siktemiddel ved jakt på hjort.

Føremål
Føremålet med forskrifta er å avverje alvorleg skade på natur- og samfunnsinteresser som fylgje av høg hjortebestand.
 

Kommunen sin vurdering
I utarbeiding av forvaltningsmål for hjort i heradet 2025 - 2027, kom ein fram til at hjortestamma i heradet framleis er høg. Det er beiteskadar på frukttre, skogplantingar og på grovfôrareal, og påkøyrslar av hjort. Registrerte slaktevekter i hjorteviltregisteret syner at slaktevektene på kalv og vaksne dyr går nedover og det vert rapportert om seine kalvingar. Stamma har dårleg kondisjon med mykje unge dyr med små kalvar, som har låge sjansar for å overleve ein streng vinter.
 

Kvam herad har vedteke mål om:

-Å redusera hjortestamma for å avgrense skadeomfanget på landbruksnæringane og påkøyringar/kollisjonar mellom hjort og motorkøyretøy.
-Betre kjønnsstrukturen med meir vaksne hanndyr i hjortebestanden.
-Auke gjennomsnittsalderen til dei vaksne dyra i bestanden. Kalv og ungdyr skal utgjere ein stor del av det samla jaktuttaket.
 

Opning for bruk av restlysforsterkande og termiske siktemiddel kan gje jegeren betre moglegheit til å identifisera dyr og sikre gode treff under dårlege lysforhold. Hjelpemidla vil gjere det enklare å ta ut dyr som beitar på innmark og ta ut dyr etter plan for avskyting. På sikt vil det bidra til å oppfylle måla ein har satt seg om bestanden.

Det er lagt inn avgrensingar for bruk av termisk kikkert og restlysforsterkande siktemiddel i forskrifta. Hjelpemidlane gjeld i ope terreng og kommunen skal vurdere vidareføring av forskriftsregelen kvart 5.år. Opent terreng er definert i forarbeida til endring av viltlova (prop. 149 L (2020-2021 s 16)): «Med «åpent terreng» menes her terreng som stort sett er fritt for hindringer som bygninger og trær. Eksempler på dette er åker, eng og beitemark. Det kan også være åpne arealer på skogsmark, som hogstflater, naturlige åpninger uten høyt feltsjikt- og buskvegetasjon og områder der skogen er høystammet og glissen.»

Vurdering etter naturmangfaldlova og dyrevelferdslova
Føremålet i viltressursloven er å sikra at forvaltning av viltressursane gjennom jakt, fangst og felling og anna handtering av vilt skjer på ein berekraftig og forsvarleg måte, i samsvar med naturmangfaldlova og dyrevelferdslova.

I vedtak som påverkar naturen skal ein vurdera §§ 8 -12 i naturmangfaldlova:
§ 8 «Kunnskapsgrunnlaget». Ein har gjennom «Forvaltningsmål for hjort Kvam herad 2025- 2027» god kunnskap om hjortestamma i heradet. Hjortebestanden er stor og levedyktig. Nyttige hjelpemiddel bidreg til å ta vare på gode produksjonsdyr og ta ut svake dyr. § 9 «Føre var prinsipp». Bruk av restlysforsterkande og termiske siktemiddel endrar ikkje jegeren sitt ansvar for tryggleik under jakta med forsvarleg skotavstand, sikker bakgrunn,sikker artsidentifikasjon og ei human jakt. Jegerane har tatt kurs og oppskyting, og skal ha den naudsynte kompetansen som krevst for utøving av jakt. § 10 «Økosystemtilnærming og samla belastning». Hjortebestanden er høg og det er eit mål å redusere hjortebestanden til ei stamma i god kondisjon. § 11 «Kostnadene ved miljøforringelse skal bæres av tiltakshaver». Ikkje relevant i saka. § 12 «Miljøforsvarlige teknikker og driftsmetoder». Jegerane må fylgja gjeldande reglar i «Forskrift om utøvelse av jakt, felling og fangst.»
 

Dyrevelferdlova har som føremål å fremja god dyrevelferd og respekt for dyr. Bruk av termiske og restlysforsterkande siktemidla vil redusere risikoen for skadeskyting, hjelpe med å ta ut svake og tynne dyr som har låg sjanse for å overleve strenge vintrar, og regulere bestanden til det som er høveleg i forhold til vinterbeite.
 

Heradet vurderer at forskrifta kan bidra til å avverje alvorleg skade på natur og samfunnsinteresser som fylgje av høg bestand, bidra til å oppnå kommunale målsetjingar for hjort og avgrense risikoen for skadeskyting under jakta. Ein vil leggje opp til å vurdere vidareføring av forskrifta samstundes som ein revidera dei kommunale måla for hjortevilt i heradet.
 

Forslag til forskrift
Heradet har fylgjande forslag til forskrift:
 

FORSKRIFT OM OPNING FOR BRUK AV RESTLYSFORSTERKANDE OG TERMISKE SIKTEMIDDEL VED JAKT PÅ HJORT I KVAM HERAD
 

Heimel: Fastsett av xxx [dato] med heimel i lov 20. juni 2025 nr. 102 om jakt, fangst og felling av vilt mv. (viltressursloven) § 26 andre ledd og forskrift 22. mars 2002 nr. 313 om utøvelse av jakt, felling og fangst § 29 a fjerde ledd.

§ 1 Formål
Formålet med opning for bruk av restlysforsterkande og termiske siktemiddel ved jakt på hjort er å avverje alvorleg skade på natur og samfunnsinteresser på grunn av høg bestandstettleik.
§ 2 Opning for bruk av restlysforsterkande og termiske siktemiddel til hjortejakt
Det er opna for bruk av restlysforsterkande og termiske siktemiddel ved jakt på hjort i ope terreng i Kvam herad.
§ 3 Rapporteringsplikt for bruk av restlysforsterkande og termiske siktemiddel
Jegerar skal rapportere bruk av restlysforsterkande og termiske siktemidla ved felling av hjort i Hjorteviltregisteret.
§ 4 Verknadsdato
Forskrifta trer i kraft frå kunngjering i Norsk Lovtidend.

Svar på høyring kan sendast som e- post til postmottak@kvam.herad.no, eller via post til kvam herad, Grovagjelet 16, 5600 Norheimsund. Frist er satt til 28.august 2026.