Turist i Kvam

Kvam er inngangsporten frå Bergen for alle som ønskjer å oppleva Hardanger. Berre ein times køyring via Kvamskogen, eit område for aktiv fritid både sommar og vinter, ligg kommunen ved Hardangerfjorden.

Sauer på beite på Bjørke - Klikk for stort bileteSauer på Bjørke. Foto: Kari Hauso Froestad  

Hardanger har vore eit viktig europeisk reisemål heilt sidan 1800-talet. Området er kjent for sin fantastiske natur og for eit levande kulturliv, og er perfekt både for dei som ynskjer ein aktiv ferie, og for dei som har lyst å slappe av. Den 179 kilometer lange Hardangerfjorden er den tredje lengste fjorden i verda.

I Kvam kan du blant anna sjå og oppleva dette:

  • Steinsdalsfossen: Ein av Noregs mest vitja fossar, som ligg like ved Fv7, to kilometer frå Norheimsund mot Bergen. Steinsdalsfossen har eit fall på 50 meter og er spesiell fordi du kan gå på baksida av fossen utan å verta våt. Det går sti frå parkeringsplassen og opp under fossen, ein fin liten spasertur.
  • Fyksesund landskapspark: Dette flotte området er tilrettelagt for natur- og kulturopplevingar, inklusive lokale smaksopplevingar, omvising i frukthagar, kajakkutleige og klatring. På sommaren kan ein ta båt frå Porsmyr kai til den veglause grenda Botnen, inst i Fyksesund.
  • Kunsthuset Kabuso: Kabuso tilbyr utstillingar, konsertar og arrangement. Kunsthuset har ein særmerkt kammermusikkhall med plass til 150 tilhøyrarar. Du kan lesa meir på Kabuso sine eigne nettsider
  • Ingebrigt Vik museum: På dette museet, som ligg i tilknytning til Kabuso, kan du sjå dei vakre skulpturane til Ingebrigt Vik. 
  • Hardanger Fartøyvernsenter: Fartøyvernsenteret har opne maritime verkstader og aktivitetar for alle, samt skiftande utstillingar og filmar. Det ligg i Norheimsund sentrum. Du kan lesa meir på nettsidene deira.
  • Sjusete skisenter, Furedalen alpin, skiløyper på Kvamskogen og Aktiven skiheis.

På nettsidene våre kan du også lesa meir om badeplassar, skiløyper og anna friluftsliv i Kvam. På ut.no finn du gode framlegg til fot- og sykkelturar. 

For meir turistinformasjon for Kvam og Hardanger, kan du besøka visitkvam.no og hardangerfjord.com.

Frå Ingebrigt Vik museum - Klikk for stort bileteFrå Ingebrigt Vik museum Øyvind Strømmen