Marius møtte Kristina då dei begge var idrettsfagstudentar i Sogndal. Det tok ikkje lang tid før Marius fekk høyra «at eg skal flytta tilbake til Øystese» av sin framtidige kjærast. Etter å ha budd i byar som Gjøvik, Oslo og Bergen blei det altså slik i 2020  – at Øystesebygda var neste stopp. For Marius var dragninga til fjord og fjell avgjerande, og for Kristina var det godt å koma tilbake til dyra på garden og å ha familien nær. Familie og vener var ein viktig faktor for paret, i tillegg til nærleik til naturen – begge kan dei vel omtalast som ekte fjellgeiter. 

I Kvam finn ein eit mangfaldig næringsliv, frå dei store verksemdene Elkem ASA Bjølvefossen, Fjellstrand AS og Lingalaks AS, til mat- og siderprodusentar, kraftproduksjon, transport, opplevingar, entreprenørar med meir. Me ligg faktisk på fjerdeplass i Vestland på næringsvariasjon. Kring tusen menneske pendlar ut av kommunen for å arbeide, medan halvparten av det igjen, pendlar inn til oss. 

Leva her

På fritida er paret titt og ofte å finna på ein fjelltopp, både med og utan ski på beina. Friluftsliv er generelt høgt på agendaen, gjerne saman med hundane på Hellestveit. Dei set pris på å vera med på det som skjer på garden. Kanskje med noko brattare læringskurve for Marius enn for odelsjenta. Marius har ein stor lidenskap for klatring, og har engasjert seg i den lokale klatreklubben som har fått ny logo og nye klubbkle etter at han vart medlem. I tillegg til faste treningstider i idrettshallen, klatrar entusiastane ute i Kvam sin frie natur. 

Då dei flytta til bygda vart fyrste bustadkjøp ein leilegheit på kaien i Øystese, rett ved fjorden. Her blei heilårsbading raskt ein fast aktivitet, med 
Øystesestranda like utanfor stovevindauga. No har dei overteke besteforeldra til Kristina sin 70-tals bustad, og står ovanfor eit stort og spennande oppussingsprosjekt. Prosjektet deira kan du følgje på Instagram under namnet: @Hellestveithuset. 

Ein typisk kvemming er ein mjuk person, 
med hardt skal - Marius

Arbeidsliv

Det varierande og for mange eit interessante næringslivet vårt er noko som også gjeld for Hellestveit gard. Garden er full av historie og har vore i den same slekta sidan 1667. Det er eit sauebruk med cirka 130 vinterfora sau, drifta av Helen og Tor. Tor er utdanna mekanikar og har utvikla sitt eige ensileringssystem kalla nSilo, som spring ut frå eit behov for syresystem på eige utstyr. Systemet blir utvikla i eigen verkstad på garden, der samanstilling og testing av komponentane blir utført før utsending til kunde. nsilo har eigen profil og nettstad.

Kristina var ferdig utdanna sjukepleiar då ho kom tilbake til Kvam, men etterutdanna seg til helsesjukepleiar i Bergen etter returen. Ho har i dag fast stilling som helsesjukepleiar i kommunen og er ein viktig del av satsinga vår på barn og unge. I tillegg til det viktige arbeidet som vert gjort med svangerskapsoppfølging av lokal jordmor og helsestasjon for dei heilt minste, har det gjennom mange år vore ei satsing på oppvekst under tittelen:  Førebygging og tidleg innsats. 

Kunnskaps- og integreringsminister Jan Tore Sanner sa ved opninga av Kvam familie- og læringssenter (2019) at «Kvam er ein av dei kommunane i landet vårt som jobbar mest med barn og ungdom». 

Vil de råda andre til å flytta til Kvam? 

JA! Det ville me.
Her har ein stort sett alt ein treng. Kort avstand til fjord og fjell, så vel som til storbyen. Der kan ein også finna det ein måtte sakna her på bygda, større breidde på kafé og resturantar, som indisk, hyppigare kinotilbod, aktivitetar som laser tag og liknande. Det er svært familievennleg her, men også interessant for unge menneske. Det er behageleg at alt er nært, folk, så vel som tenster og arbeidsplass. 

No står sommaren for tur og det er lett å ta imot gjester frå Toten, Innlandet og elles. Fjord og fjell viser seg frå si beste side på denne tida av året. Marius får vist fram og fotografert fjell, turhytter, klatreveggar og badeplassar. Kristina ser fram til å ta imot gjester til årets Bygdalarm og gjentek gjerne suksessen frå tidlegare år, og lagar eit eige “førfest-område” med heimesnikra bar. 
Det blir ikkje meir moro enn ein lagar sjølv!