Elevar som har rett på skuleskyss får utlevert busskort av kontaktlærar første skuledagen eller så snart skulen har motteke korta.

Gratis skuleskyss gjeld til og frå ordinær start- og sluttid på skulen. Det vert ikkje innvilga fri skyss til og/eller frå SFO. 

Skuleskyssen vert organisert av fylkeskommunen v/Skyss og i hovudsak som kollektivtransport.

Elevar som ikkje har rett på gratis skuleskyss kan òg nytta seg av skulebussen, men må betala sjølve. Sjå Skyss.no for prisar.

I nokre tilfelle kan elevar ha rett på gratis skuleskyss på grunn av særleg farleg og vanskeleg skuleveg utan omsyn til veglengda.

I Trafikksikringsplan for Kvam herad er det vedteke at ei trafikkfagleg nemnd skal vurdera særleg farleg eller vanskeleg skuleveg. Nemnda har årleg vurdering/gjennomgang av skulevegar som kan vera særleg farlege eller vanskelege. Intensjonen med å ha ei trafikkfagleg nemnd i samarbeid med Statens vegvesen og politiet, er å sikra at Kvam herad har ei rettferdig og lik sakshandsaming i heile kommunen når det gjeld skuleskyss-søknader på grunn av særleg farleg og vanskeleg skuleveg.

Elevar som ferdast i trafikken vil alltid vera utsett for ein viss fare. Dette er likevel ikkje nok til å få innvilga skyss, då det må vera tale om ein «særleg risiko». Ved søknader om særleg farleg eller vanskeleg skuleveg skal ein vurdera tilstanden til skulevegen. I samband med dette vert følgjande moment vurdert:

•   Vegstandard
•   Trafikkmengd
•   Kryssing av veg
•   Fart
•   Val av veg
•   Vegforhold etter årstidene
•   Individuell vurdering/alder

Etter lova kan ikkje Kvam herad gjera eit samla vedtak om at barna som bur langs ein skuleveg skal få innvilga skuleskyss på grunn av særleg farleg eller vanskeleg skuleveg. Kommunen har plikt på seg til å handsama like saker likt, samtundes er det ei plikt å vurdera kvar søknad individuelt.

Sideveg
Dersom skulevegen er meir enn 2 km (1.trinn) eller 4 km (2. – 10.trinn), og de meiner skulevegen fram til eleven kjem seg på bussen, er særleg farleg eller vanskeleg: fyll ut Skyss sitt skjema for søknad om skuleskyss grunna særleg farleg skuleveg. Dette skjemaet skal leverast på skulen. Det er Skyss som skal behandla denne søknaden. 

Hovudveg
Dersom skulevegen er mindre enn 2 km (1.trinn) eller 4 km (2. – 10.trinn), og de meiner at skulevegen er særleg farleg eller vanskeleg, er det Kvam herad som skal handsama søknaden. Me ber dykk då søkja via det digitale skjemaet til Kvam herad. For å få tilgang til skjemaet må de logga dykk på med bank-ID eller tilsvarande.

Delt bustad
For elevar med delt bustad (mor og far ha ulik adresse, og barnet/ungdomen bur begge stader) som skal ha eller det vert søkt om skuleskyss for, ber me dykk fylla ut skjemaet "Avtale om delt bustad" frå Skyss og levera det på skulen. Me ønskjer også at de bruker dette skjemaet både ved ordinær skyss eller skyss grunna særleg farleg eller vanskeleg veg. 

Skuleskyss for funksjonshemma eller midlertidig skada/sjuke elevar vert regulert i opplæringslova § 4-1.

Elevar som har behov for skyss på grunn av funksjonshemming, midlertidig skade eller sjukdom, har rett til det uavhengig av avstanden mellom heim og skule. Legeattest må leggast ved søknaden om skyss for midlertidig skada eller sjuke elevar.

Elevar som har plass i SFO, og som har behov for skyss på grunn av funksjonshemming eller midlertidig skade eller sjukdom, har rett til skyss til og frå skulefritidsordninga. Retten omfattar ikkje skyss i skuleferiane.

Søknad om rett til gratis skuleskyss på grunn av funksjonshemming eller midlertidig skade/sjukdom skal sendast til rektor på skulen som eleven går på.