Skadestad Elkem Bjølvefossen under beredskapsøvinga 21. november.

Takk til 250 personar

Øvinga simulerte eit krevjande scenario med brann og fare for eksplosjon ved Elkem Bjølvefossen, der eit større område skulle evakuerast. Ei slik hending krev god koordinering og samhandling. Gjennomføringa synte at samarbeidet mellom dei ulike etatane fungerte godt.

Det vert retta ein stor takk til alle dei rundt 250 involverte som bidrog til at øvinga vart vellukka. Engasjementet og viljen til å øva var avgjerande for resultatet.

Ein stor takk går spesielt til:

• Nødetatane (politiet, Helse Bergen, Kvam legevakt og Kvam brann og redning) for innsatsen ved fabrikken og handteringa av scenarioet.
• Elkem ASA Bjølvefossen for å stille fasilitetar til disposisjon, og eit godt samarbeid.
• Alle markørane som spelte rolla som evakuerte og pårørande i Øystese, som bidrog til å gjera øvinga realistisk.
• Dei frivillige organisasjonane som er positive og stiller opp for å bidra under kriser, og er med på øvingar for å vera best mogleg førebudd.
• Kvam herad si kriseleiing for øving med koordinering av alle involverte, krisekommunikasjon og samhandling.

Systematisk øving og årleg hovudfokus

Øvinga er ei viktig brikke i eit systematisk planverk for beredskap i Kvam. Planverket inkluderar fleire mindre øvingar som blir gjennomført utover året, men denne øvinga var den store, årlege hovudøvinga.

Gjennom slik jamn og systematisk trening styrkjar kommunen si evne til å handtere alvorlege hendingar og sikrar at samhandlinga fungerer mellom alle involverte partar.

Kommunal beredskap styrka

Kvam herad øvde spesifikt på å ta imot evakuerte og pårørande i Øystese, aktivere kommunen si kriseleiing og sikre god krisekommunikasjon. Desse måla vart nådd, og føremålet med å styrkja evna til å handtere alvorlege hendingar og sikre god samhandling med alle aktørar vart oppfylt.

Øvinga gav ei viktig gjennomkøyring av rutinar for å gje trygg og tydeleg informasjon til innbyggjarane.

Evaluering

For å sikra eit godt læringsutbytte, er det umiddelbart sett i gang ei grundig evaluering av øvinga.

Sjølv om gjennomføringa gjekk som planlagt, er det viktig å hente ut læring for å bli endå betre i ein reell situasjon. Målet med evalueringa er å identifisere både styrker og moglege forbetringspunkt. Resultata vil danna grunnlaget for framtidig øving og utvikling i beredskapen i Kvam.