I mange kommunar er det for tida store utfordringar knytt til rekruttering av nye fastlegar. Mellom anna er det mange ledige fastlegepostar tilgjengelege i Bergen. I Kvam har me vore heldige, og kan no ynskja to nye fastlegar velkomne til Kvam. 

Ramona Gjøsæter Myklebust har overteke etter Erling Lyngset som fastlege ved Norheimsund legesenter frå 1. januar. Ho er kvemming, og busett i Øystese. 

Dag Erlend Skjelbreid har overteke som kommuneoverlege etter Arne Aksnes, frå 1. februar. Skjelbreid var tidlegare fastlege ved Helsebanken legekontor. Der overtek no Per Øystein Opdal. Han kjem frå Kvinnherad og er for tida busett i Bergen, men flyttar til Kvam i løpet av året. Han er kjent i og med kommunen frå før, etter å ha arbeidd som vikar ved Kvam legevakt. Opdal tek til frå 1. mars. 

Som kommuneoverlege har Skjelbreid kontordagar på Kvam rådhus måndagar, tysdagar og fredagar. Onsdagar og torsdagar arbeider han med administrative oppgåver hjå Kvam legevakt, og som sjukeheimslege ved Øysteseheimen og Toloheimen.