Sakspapira til møtet er tilgjengelege via Kvam herad sin digitale møteportal. Her på kvam.no har du tidlegare også kunna lesa om nokre av tilrådingane formannskapet har kome med:
Trafikktryggleik på kartet
Arbeidet med rullering av trafikksikringsplanen for Kvam for perioden 2020- 2023 vart starta i april 2019, med mål om å ha planen godkjend i innan utgangen av 2019.
Tidleg i april i fjor vart det invitert til innspel gjennom desse nettsidene, og seinare same månad også gjennom Hordaland Folkeblad og i brev sendt til barnehagar, skular, grendeutval og andre. I alt er det registrert heile 2020 innspel, inklusive innspel som låg att frå tidlegare rullering av planen. Desse har vorte vurderte, og mange av dei er bakt inn i planen som no vert lagt fram for formannskapet og heradsstyret. Sjølve planutkastet har ikkje vore på høyring. Planen inneheldt ei lang rekkje tiltak, blant dei topprioriterte er fullføring av gang- og sykkelveg på strekninga Øystese - Laupsa, gangveg på strekninga mellom Pensjonisten og Torget i Ålvik, gjennomgang av fartstiltak i dei ulike tettstadene i kommunen og strakstiltak ved Norheimsund skule, Øystese barneskule og Kvam ungdomsskule.
Saka har vore oppe i både ungdomsrådet og formannskapet tidlegare. Ungdomsrådet gav si støtte til rådmannen sitt framlegg til vedtak, men understreka at det er viktig å ta vare på dei mjuke trafikantane, og peikte då særleg på farlege kryssingspunkt på skulevegane. Dei etterlyste også oppgradering av dekket på den gamle Straumsbrua i Norheimsund.
Formannskapet slutta seg også til rådmannen sitt framlegg, men la til nokre ytterlegare punkt som må innarbeidast, blant anna knytt til kryssing av vegen i Vikøy sentrum og opprydding i siktsona i krysset mellom Kaldestadvegen og Kvam auto. Formannskapet peikte også på at det er behov for avklaringar rundt vidare framdrift i arbeidet på strekkja Dragsbrua - Augastad.
Klimapartner no, eller seinare?
Klimapartnere er eit partnarskap mellom akademia, offentlege og private verksemder, som arbeider for å redusera eigne klimagassutslepp, og også arbeider saman for grøn samfunns- og næringsutvikling. Dei fleste medlemene er private verksemder, men Bergen, Bjørnafjorden, Osterøy, Stord og Samnanger kommunar er også medlemer. I samband med budsjettet for 2020 vedtok heradsstyret at ein skulle vurdera medlemskap.
Når det gjeld medlemskap i Klimapartnere Vestland hadde rådmannen i utgangspunktet lagt fram to alternative framlegg: det eine var at Kvam herad melder seg inn frå 1. mars 2020. Det andre var at ein fyrst skal prioritera arbeidet med energi- og klimaplan, og at det skal gjerast ei ny vurdering av medlemskap i samband med arbeidet med denne planen. I saksutgreiinga skriv rådmannen at eit medlemskap kan vera til nytte i arbeidet med klimaplanen, men også at det kan føra til at prosessen med både planarbeid og oppfølging av medlemskapen kan koma til å gå seinare, fordi ein har ei avgrensa mengd ressursar i administrasjonen.
Ungdomsrådet, og eit fleirtal i formannskapet, har rådd til den sistnemnde løysinga, medan eit mindretal på tre ynskte medlemskap allereie frå 1. mars.
Debatten er også omtalt i lokalavisa Hordaland Folkeblad si fredagsutgåve.
Kva er framtida for Hardangerrådet?
Etter at det var klart at fire av dei sju tidlegare medlemskommunane i det interkommunale Hardangerrådet skulle slåast saman til Ullensvang kommune og Voss herad, starta ein ny debatt om kor vidt rådet skal utvidast til å omfatta tidlegare Voss kommune, samt om framtidig driftsform og finansiering av Hardangerrådet. Dette skal diskuterast av Hardangerrådet 19. mars 2020, og dei ulike heradsstyra er difor bedne om å ta stilling til temaet.
Rådmannen si tilråding (PDF, 619 kB), levert som ei ekstrasak til heradsstyremøtet, er at Kvam skal halda fram med å delta i regionrådet for Hardanger og Voss, men ho peiker samstundes på at den noverande driftsforma er for sårbar og på at utgiftsnivået bør reduserast. I tilrådinga til heradsstyret skriv ho også at alternative driftsformer bør vurderast av ein uavhengig aktør, og at oppgåvene eventuelt bør leggjast ut på anbod.
Sjå også: Kvammaordføraren opna Hardingtinget
To interpellasjonar
Det har kome to interpellasjonar til heradsstyremøtet. I den eine uttrykker Hans Arne Børsheim (KrF) uro over valet av kjøkenløysing for Strandebarmheimen. Han føresler at heradsstyret skal be rådmannen koma attende med ei vurdering av moglegheitene for å etablera eit institusjonskjøken ved heimen, og ber også om status når det gjeld samlokalisering av helsetenester som lege, fysioterapi og helsestasjonen.
I den andre ber Kvam Senterparti rådmannen utgreia moglegheita for å setja av eit areal i Kvam til motorsportbane, og syner dei til at det er mange motorsportinteresserte ungdomar og vaksne i heradet. Dette er også eit temaet ungdomsrådet har teke opp i samband me si handsaming av den tidlegare nemnde trafikksikringsplanen.